Í dag borðuðu nemendur í fyrsta sinn hádegisverð í Hádegismóum, nýjum matsal skólans.  Voru nemendur og starfsmenn afskaplega ánægðir með nýju aðstöðuna sem er í björtum og rúmgóðum sal í nýja húsnæðinu. 
Sjá myndir

Fyrsti nemendaskóladagurinn í Norðlingaskóla á þessu skólaári rann upp bjartur og fagur. Heiðskír himinn og sól skein í heiði. Eftirvæntingafullir, glaðværir og brosandi nemendur og foreldrar streymdu að skólanum í morgunsárið. Eftirvæntingin fólst ekki hvað síst í því að stór hópur nemenda var að hefja skólagöngu í Norðlingaskóla í fyrsta sinn og um 200 þeirra í nýju húsnæði skólans. Allt var klárt og tilbúið og starfsfólk tók stækkandi hópnum fagnandi. Um 350 nemendur hófu nám við skólann í dag, þar af um 70 nýir nemendur. 

Myndir 

Mánudagurinn 23. ágúst var fallegur dagur. Hlýr, sólríkur og glaðvær. Á Norðlingaholtinu fór fram undirbúningur fyrir skólastarf komandi vetrar, í eldra húsnæði og nýju. Allir lögðust á eitt að ljúka því sem að var stefnt og margar hendur lögðu lið. Nýjum áföngum yrði náð í dag.
Þegar leið yfir nónbil tóku háir og lágir að streyma í Björnslund, hvanngrænan og fagran eftir sólríkt, hlýtt og sptrettugott sumar. Fegurð hans hefur sjaldan, ef nokkurn tíma, verið álíka. Þannig varð hann hrífandi umgjörð utan um hóp nemenda á öllum aldri, foreldra þeirra og ættingja sem og starfsfólk Norðlingaskóla. Komið var að skólasetningu fyrir skólaárið 2010–´11. Glaðværð einkenndi hópinn sem var að hittast eftir gott sumarleyfi. Allir tilbúnir að koma í skólann og takast á við viðfangsefni vetrarins. Sif Vígþórsdóttir, skólastýra, flutti stutta tölu, bauð alla velkomna og setti skólann formlega. Fólk spjallaði saman, faðmaðist og gladdist. Sjötta starfsár Norðlingaskóla er hafið.

• Hér má sjá myndir
• Skólasetningarræða skólastjóra

Norðlingaskóli verður settur mánudaginn 23. ágúst kl. 16:00 í Björnslundi, útiskólastofu skólans. Gert er ráð fyrir stuttri samkomu í lundinum við Skógarhúsið og að því loknu verður boðið upp á hollustuhressingu í tilefni dagsins. Foreldrar, yngri og eldri systkini, ömmur og afar og aðrir áhugamenn um skólann okkar eru velkomnir með.

Kennsla í skólanum hefst samkvæmt stundaskrá þriðjudaginn 24. ágúst kl. 08:10 hjá öllum nemendum og munu umsjónarkennarar hitta nemendur sína í heimastofum og kynna fyrir þeim starf vetrarins.  Skipulagið fyrstu vikuna verður að einhverju leyti óhefðbundið.  Unnið verður á margvíslegan hátt, bæði úti og inni og því er mikilvægt að nemendur komi með skjólgóðan fatnað þessa daga í skólann. Þá er ljóst að við verðum á ferð og flugi alla vikuna og því ekki alltaf heima í skóla á morgunhressingartíma. Þess vegna þurfa nemendur að koma með nesti í stað morgunhressingar fyrstu skólavikuna. Hádegisverður verður hins vegar í skólanum.